मालीमा तैनाथ नेपाली शान्ति सेना स्वदेश फर्कियो
काठमाडौँ । संयुक्त राष्ट्रसङ्घको आह्वानमा शान्ति स्थापनार्थ मालीमा तैनाथ नेपाली शान्ति सेनाको नवौँ डफ्फा स्वदेश फर्किएको छ । डफ्फामा ८१ जना नेपाली शान्ति सैनिक रहेका नेपाली सेना सैनिक जनसम्पर्क निर्देशनालयले जनाएको छ । प्रमुख सेनानी चित्रकुमार कार्कीको नेतृत्वमा हातहतियार तथा बन्दोबस्तीका सामग्रीसहित संयुक्त राष्ट्रसङ्घको चार्टर्ड विमानद्वारा आज बिहीवार ८१ जनाको डफ्फा स्वदेश फिर्ता भएको हो ।
मालीमा तैनाथ शान्ति मिसन बन्द गर्ने संयुक्त राष्ट्रसङ्घको निर्णयअनुरूप नेपाली सेनाको टोलीमा रहेका एक सय ५६ जना एवम् स्टाफ तथा पर्यवेक्षक नियुक्तिमा कार्यरतसमेत एक सय ६८ जना सकल दर्जा स्वदेश फिर्ता हुने क्रममा पहिलो टोली आज नेपाल आइपुगेको हो ।
नेपाल संयुक्त राष्ट्रसङ्घको शान्ति स्थापनाका लागि विश्वभर तैनाथ मिसनमा फौज उपलब्ध गराउने सदस्य राष्ट्रको दोस्रो वरीयतामा रहेको छ । अहिले नेपालबाट पाँच सय ८२ महिला शान्ति सैनिकका रूपमा खटिएका छन् । जुन महिलातर्फ शान्ति सेनामा सबैभन्दा ठूलो सहभागिता भएको निर्देशनालयले जनाएको छ ।
