एमालेको पूर्वसभासद विनोद चौधरी कांग्रेसमा, सांसद बनाउने पक्का
काठमाडौं : उद्योगी तथा एमालेका पूर्व सांसद विनोद चौधरीलाई कांग्रेसले समानुपातिक सूचीमा राखेको छ। फोर्ब्सको विश्वकै धनीहरुको सूचीमा परेका उनलार्इ कांग्रेसले निर्वाचन आयोगमा आइतवार राति बुझाएको समानुपातिक सूचीमा राखेको हो । स्रोतका अनुसार उनलाई मधेसी, अल्पसंख्यक मारवाडी कोटाबाट समानुपातिकको सूचीमा राखिएको छ ।
यसअघि चौधरी ०६४ सालको संविधानसभा निर्वाचनमा एमालेबाट समानुपातिक सभासद भएका थिए । भने ०७० मा एमालेबाटै नवलपरासीबाट प्रत्यक्षका लागि सिफारिस भएका थिए । तर, उनले त्यहाँ चुनाव लड्न चाहेनन् ।
पार्टीलाई चुनावका लागि आर्थिक सहयोग गर्ने आश्वासनपछि चौधरीलाई समानुपातिकमा राखिएको कांग्रेस स्रोतको भनाइ छ । चौधरीलाई कांग्रेसमा ल्याउने महामन्त्री सशांक कोइरालाले विशेष पहल गरेका थिए । समानुपातिक सूचीको सुरुआतीतिरै चौधरीको नाम भए उनी सांसद हुने पक्का छ। यसपालि समानुपातिकको बन्दसूची पठाइएको छ जुन सूचीका नाम तलमाथि हेरफेर गर्न पाइँदैन।
एमालेभित्र माधव नेपाल निकट रहेका उनी केपी ओली शक्तिमा आएसँगै छाँयामा परे । एमाले नेता एवं पूर्व अर्थमन्त्री भरतमोहन अधिकारीका प्रिय रहेका चौधरीको कांग्रेस नेताहरुसँग पनि सुरु देखिनै निकट सम्बन्ध थियो ।
चौधरी विश्व प्रसिद्ध फोर्ब्स म्यागेजिनको अर्बपतिको सूचिमा पर्ने एक मात्र नेपाली हुन।फोर्ब्सले जनाए अनुसार अहिले उहाँको सम्पत्ति एक अर्ब ३० करोड अमेरिकी डलर रहेको छ । चौधरी समूहको विश्वका विभिन्न देशका होटेलमा लगानीसमेत रहेको छ । लोकप्रिय चाउचाउको वाइवाइको ब्रान्डलाई समेत विश्वका विभिन्न देशमा चौधरी समूहले विस्तार गरिसकेको छ ।