मुद्दा दायर हुनासाथ सांसद रौनियार स्वतः निलम्बित, सभामुखलाई पनि अख्तियारले जानकारी दियो
काठमाडौं, १९ असोज । अख्तियार दुरुपयोग अनुसन्धान आयोगको प्रमुख आयुक्तमा नियुक्त भएको १५ दिनमै नवीन घिमिरेले गुणस्तरहीन काम गर्ने ठेकेदार सांसद हरिनारायण रौनियारमाथि मुद्दा दायर गरेर आयोग टुलुटुलु हेरेर नबस्ने संकेत गरेका छन् ।
पप्पु कन्स्ट्रक्सनबाट बर्दिया सदरमुकाम गुलरिया र बारबर्दिया नगरपालिका जोड्ने जब्दीघाटको बबई पुल निर्माणमा गुणस्तरहीन सामग्री प्रयोग भएको, पुल बनाउँदाखेरि नै बाङ्गो देखिएको र उदघाटन नहुँदै भत्किएको उजुरीमा अनुसन्धान गरी अख्तियारले शुक्रबार विशेष अदालतमा सांसद रौनियारसहित १२ जनाविरुद्ध मुद्दा दायर गरेको छ ।
सांसद रौनियार सत्तारुढ दल संघीय समाजवादी फोरमका सांसद हुन् । उनले ठेक्का लिएका अधिकांश पुल र सडक गुणस्तरहीन भएको र ठेक्का लिएको बर्षौसम्म पनि काम सम्पन्न नगरेको आरोप छ । पप्पु कन्ष्ट्रक्सनले रौतहटको लालबकैया नदीमा समयमा पुल नबनाएका कारण एक महिनाअघि डुंगा दुर्घंटना हुँदा करिब १० जनाको मुत्यु भएको थियो । त्यसपछि पप्पु कन्ष्ट्रक्सनका एकपछि अर्को कर्तुत सार्वजनिक भएका हुन् । पप्पु कन्ष्ट्रक्सनका तत्कालीन प्रमुख सांसद रौनियार हुन् । उनी सांसद भएपछि उनले छोरा सुमित रौनियारलाई कन्ष्ट्रक्सनको प्रमुख बनाएका छन् ।
सांसद रौनियारसहित उनका छोरा सुमित, सडक डिभिजन कार्यालय बाँकेका तत्कालीन डिभिजन प्रमुखहरु भानु जोशी, मनोज श्रेष्ठ, राजेशकुमार यादव, नवराज केसी, इन्जीनीयर प्रेमप्रसाद चुवाई, हरिबहादुर बिष्ट, दीपेन्द्रबहादुर बिष्ट, सबइन्जीनीयर कर्मा तेन्जिङ तामाङ, गोविन्द गैरेविरुद्ध अख्तियारले मुद्दा दायर गरेको छ । रौनियार बाबुछोरालाई नै १९ करोड ३२ लाख २५ हजार ६ सय २५ रुपैयाँ बिगो कायम गरिएको छ ।
अख्तियारले ठेकेदार सांसद रौनियारबिरुद्ध मुद्दा दायर गरिसकेपछि त्यसको जानकारी सभामुख कृष्णबहादुर महरालाई दिइसकेको छ । अख्तियारका एक उच्च अधिकारीले सभामुख महरालाई सांसद रौनियारविरुद्ध विशेष अदालतमा मुद्दा दायर गरेको जानकारी दिइसकिएको छ । अदालतमा मुद्दा पर्नासाथ सांसद स्वतः निलम्बन हुने कानुनी ब्यवस्था छ ।
