बुटवल ब्लास्टर्सका सोमपाल चम्किएपछि पारसको चितवन राइनोज पराजित
पोखरा, १० कात्तिक । सोमपाल कामीले उत्कृष्ट बलिङ गर्दै ४ विकेट लिएपछि पोखरा प्रिमियर लिग पीपीएलमा बुटवल ब्लास्टर्सले चितवन राइनोजलाई पराजित गरेको छ ।
शनिवार भएको पहिलो खेलमा सोमपालको बुटवलले राष्ट्रिय टिमका कप्तान रहेका पारस खड्काको टिम चितवन राइनोजमाथि ७० रनको जित हात पारेको हो ।
पोखरा रंगशालामा टस हारेर पहिले ब्याटिङ गरेको बुटवलले खराब शुरुवात गरेपछि निर्धारित २० ओभरमा ८ विकेट गुमाएर १३५ रन बनाएको थियो । १० रन हुँदा ३ विकेट गुमाएपनि सागर पुन र शंकर रानाले चौथो विकेटका लागि ६८ रनको साझेदारी गर्दै बुटवलको इनिङ्स उकासेका थिए।
रानाले ४८ र सागरले ४६ रन बनाए। सिद्धान्त लोहनी १७ रनमा नटआउट रहे। सोमपाल कामी ६, भिम शार्की २, चिराग शुरी १ रनमा बउट भए भने रोहन मुस्ताफाले खाता खोल्न सकेनन् ।
चितवनका लागि करण केसीले २ तथा रामनरेश गिरी र शक्ती गौचनले १–१ विकेट लिए । जवाफमा १३६ रनको सामान्य लक्ष्य पछ्याएको चितवनले ब्याटिङमा खराब शुरुवात गर्यो । पेपरमा बलियो देखिएको चितवनको ब्याटिङ सोचेअनुसार चल्न सकेन । चितवन १६.५ ओभरमा ६५ रनमै अलआउट भयो ।
पोखरा प्रिमियर लिग पोखरामा शनिबार पोखरा प्रिमियर लिग (पिपिएल) क्रिकेट प्रतियोगिताको चितवन राईनोज र बुटवल ब्लास्टर्सबीच भएको खेल हेर्दै दर्शक ।
पहिलो ओभरमा सोमपाल कामीले अनिल शाह र दोस्रो ओभरमा ललित भण्डारीले सोनु तामाङलाई शुन्यमा कउट गरेपछि चितवनले लगातार विकेट गुमायो ।
चितवनका लागि दशौँ नम्वरमा ब्याटिङ गरेका भुवन कार्कीले सर्वाधिक रन बनाए । यस्तै कप्तान पारस खड्काले १० रन जोडे भने बाँकी खेलाडीले दोहोरो अंक समेत छुन सकेनन् ।
चितवनलाई अलआउट गर्न बुटवलका कप्तान सोमपाल कामीले ४ ओभरमा १३ रन खर्चेर सर्वाधिक ४ विकेट लिए । यस्तै ललितसिंह भण्डारीले २ विकेट लिए । रोहन मुस्ताफा, विपिन खत्री र अभिनाश बोहराले १–१ विकेट लिए ।
