बच्चा जन्मिएको खुशीमा क्यासेट बजाउन खोज्दा ११ हजार भोल्टकाे करेण्ट, दुईको गयो ज्यान
काठमाडौं, ११ फागुन । सन्तान जन्मिँदा सबैलाई खुशी लाग्छ । यहि खुशी मनाउन खोज्दा महोत्तरीमा भने दुःखद दुर्घटना भएको छ ।
बच्चा मन्मिएको खुशीयालीमा आयोजित भोजमा क्यासेट बजाउन लाइन जोड्ने क्रममा ११ हजार भोल्टेजको करेण्ट लाग्दा महोत्तरीको लोहारपट्टीमा दुई जनाको ज्यान गएको छ । मृत्यु हुनेमा लोहारपट्टी नगरपालिका ३ बस्ने ३० वर्षीय भरत यादव र २५ वर्षीय रामईश्वर यादव रहेका छन् ।
जिल्लाको लोहारपट्टी नगरपालिका–२ का कासकल मुखियाको घरमा शुक्रबार राति बच्चा जन्मेको खुशीमा भोज रहेको र सोही बेला उनीहरूलाई करेण्ट लागेको हो । बिहेको भोजमा क्यासेट बजाउनका लागि बिजुलीको पोलमा तार जोड्न खोज्दा ११ हजार भोल्टको तार छोइएपछि उनीहरुलाई करेण्ट लागेको प्रहरीले जनाएको छ ।
करेण्ट लागेर गम्भिर घाइते भएका उनीहरुको उपचारका क्रममा जनकपुर अञ्चल अस्पतालमा मृत्यु भएको हो ।
