एउटै काउली १४ किलो बढी
काठमाडौं: म्याग्दीका एक किसानले साढे १४ किलोग्राम तौल भएको एउटै काउली फलाएका छन् । म्याग्दीको रघुगंगा गाउँपालिका–२, भगवतीका पदमबहादुर कार्कीले यति ठूलो काउली फलाएका हुन् ।
कार्कीको वारीमा फलेको काउलीको तौल चौध किलो ५ सय ग्राम छ। त्यो काउलीको मंगलबार तौल लिइएको थियो । त्यसक्रममा साढे १४ किलो पाइएको स्थानीयवासी दलबहादुर कार्कीले जानकारी दिए । कार्कीले व्यावसायिक तरकारी खेती गर्दै आएका छन्। उनले उत्पादन गरेको तरकारी भगवतीमै खपत हुने गरेको छ ।
मिहेनत र पौरख गर्न सकेमा कृषि पेशामा राम्रो सम्भावना भएको सन्देश कार्कीले प्रवाह गरेका वडा अध्यक्ष रिम कटुवालले बताए । भगवतीका कृषकलाई समेटेर व्यावसायिक बनाउन र उत्पादनको बजारीकरणका लागि वडाले सहयोग गर्ने सोच बनाएको अध्यक्ष कटुवालको भनाई छ। रासस
