ओली–प्रचण्डले जुराएको ‘नेपाल कम्युनिष्ट पार्टी’ पहिल्यै आयोगमा दर्ता
काठमाण्डौं, ८ फागुन : नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डले एकीकरणपछि जुटाएको नयाँ पार्टी ‘नेपाल कम्युनिष्ट पार्टी’ निर्वाचन आयोगमा पहिला नै दर्ता भएको पाइएको छ ।
ओली–प्रचण्डले जुराएको नयाँ पार्टीको नाम ऋषिराम कट्टेल अध्यक्ष रहेको नेपाल कम्युनिष्ट पार्टी गत मंसिर १० र २१ गतेको निर्वाचनमा ‘घन र कोदालो’ चिन्हमा दर्ता भएको भेटिएको छ । आज एकीकरणपछिको पार्टी दर्ता गर्न जाने तयारी भइरहेका बेला आयोगले यस्तो जानकारी गराएपछि अब ओली–प्रचण्डले कस्तो कदम चाल्ने र पार्टीको नाम के जुराउने हुन् भन्नेबारे प्रतिक्रिया आउन बाँकी नै छ ।
आयोगका कानुन शाखाका अधिकृत घमचन्द्र तिम्सिनाका अनुसार नेपाल कम्युनिष्ट पार्टी २०४८ सालअघि नै आयोगमा दर्ता छ । नेपाल कम्युनिष्ट पार्टीको नाम नेत्रविक्रम चन्द विप्लव समूहले पनि दाबी गर्दै आएको छ । तर, चन्दको पार्टी आयोगमा दल दर्ता नभएका कारण उनको दावी आयोगको दायरामा नपर्ने जनाइएको छ । आयोगले प्रतिनिधि सभा निर्वाचनमा सहभागिता लागि दल दर्ता आह्वान गर्दा पनि नेपाल कम्युनिष्ट पार्टी २०७४ साल भदौ १० गते दर्ता गरेको थियो ।
आयोगले पहिला नै सोही नाममा अर्को दल दर्ता भएको अवस्थामा नयाँ दल सोही नाममा दर्ता गर्दैन । योसँगै दुई ठूला वाम गठबन्धनले अर्को नाम जुराउनु पर्ने हुन्छ । २०७३ स्थानीय तह निर्वाचनमा सहभागिताका लागि आयोगले दल दर्ता आव्हान गर्दा पनि नेपाल कम्युनिष्ट पार्टीले आवेदन दिएको थियो ।
त्यतिबेला पनि आयोगले ३९ नम्बरमा नेपाल कम्युनिष्ट पार्टीको सूची प्रकाशित गरिदिएको थियो । राजनीतिक दलसम्बन्धी ऐनको दफा ६ को १ (ङ) मा दलको नाम वा चिन्ह आयोगमा दर्ता कायम रहेको दलको नाम वा चिन्हसँग मिल्ने भएमा दर्ता हुन नसक्ने उल्लेख छ । यसअघि मधेस केन्द्रित दलहरु एक भएर राष्ट्रिय जनता पार्टीको नाममा दर्ताका लागि आयोग पुगेका बेला पनि दर्ताका लागि अस्वीकार गरिदिएको थियो ।
पछि राजपाले नामको पछाडि नेपाल शब्द जोडेको थियो । नेकपा एमाले र माओवादी केन्द्र मिलेर अब एउटै कम्युनिष्ट पार्टी बनाउने एकीकृत पार्टीको नाम नेपाल कम्युनिष्ट पार्टी राख्ने सहमतिमा हस्ताक्षर गरेका छन् ।
प्रधानमन्त्री निवास बालुवाटारमा मंगलबार राति ११ बजेसम्म चलेको एकता संयोजन समिति बैठकले यस्तो निर्णय गरेको हो । दुवै दलका अध्यक्षसहित आठ जनाले पार्टी एकता गर्ने सातबुँदे सहमतिपत्रमा हस्ताक्षर गरेका छन् । सहमतिअनुसार एकीकृत पार्टीको निर्देशक सिद्धान्त ‘माक्र्सवाद र लेनिनवाद’ रहने छ ।