गृहमन्त्रीको निर्देशनमा सिरुवा कम्पनीका बस्नेत पक्राउ, देशभरका ‘लापर्वाह’ ठेकेदारको बन्दैछ सूची
काठमाडौं, ४ जेठ । समयमा काम सम्पन्न नगरेको भन्दै प्रहरीले एक जना निर्माण ब्यवसायीलाई पक्राउ गरेको छ । ठेक्का दिएको काम समयमा नसकेको भन्दै सिरुवा कन्सट्रक्सन कम्पनीका व्यवसायी सुरेन्द्र बस्नेतलाई प्रहरीले पक्राउ गरेको हो ।
भवन, सडक तथा पुल निर्माणको ठेक्का लिएर लापर्बाही ढङ्गले काम गर्ने कम्पनी र ठेकेदारको सूची बनाएर एक साताभित्र पठाउन गृहमन्त्री रामबहादुर थापा ‘बादल’ को निर्देशनपछि गृह मन्त्रालयले जिल्ला प्रशासन कार्यालय बिहीबार परिपत्र जारी गरेको थियो । मन्त्रालयको परिपत्र अनुसार प्रहरीले जिल्ला प्रशासन कार्यलयको निर्देशनमा उनलाई पक्राउ गरेको हो ।
पृथ्वी राजमार्गको कास्कीस्थित गगनगौँडादेखि लेखनाथ नगरपालिकासम्मको १४ सय ७४ मिटर सडक १५ महिनामा सम्पन्न गर्ने गरी ठेक्का सिरुवा कन्सट्रक्सन कम्पनीले पाएको थियो । ’जिल्ला प्रशाससन कार्यालयको निर्देशनमा पक्राउ गरेको हौं’, जिल्ला प्रहरी कार्यालय कास्कीका प्रमुख प्रहरी उपरीक्षक ओमबहादुर रानाले भने । बस्नेतले सडक स्तरउन्नतिको लागि २ करोड ४४ लाख रुपैयाँमा ठेक्का लिएका थिए । पक्राउ परेका बस्नेतलाई समयमा नै काम सक्ने लिखित कागज गराएर छोड्ने तयारी भइरहेको छ ।