बाइक किन्ने योजनामा हुनुहुन्छ ? छिटो गर्नुस् फागुनदेखि बढ्दैछ बाइकको मूल्य
काठमाडौं, २८ माघ । के तपाई बाइक–स्कुटर किन्ने योजनामा हुनुहुन्छ । उसो भए योजनालाई जतिसक्दो छिटो कार्यान्वयन गर्नुस् । होइन भने तपाईले यी सवारीसाधन खरिदमा बढी मूल्य लगाउनु पर्ने हुन्छ ।
बजारमा किन्दै आएका बाइक तथा स्कुटर अबको फागुन महिनापछि कम्तीमा ५ हजारदेखि बढीमा ३० हजारसम्म महंगो हुने भएको छ । नेपाली बजारमा बिक्री हुने अधिकांश बाइक तथा स्कुटर भारतीय बजारमा उत्पादन भएर नेपाल आउने हुँदा बाइक तथा स्कुटरको मूल्य वृद्धि हुने भएको हो ।
भारत सरकारले २०१९ को अप्रिलपछि १२५ सीसीसम्मका बाइकमा कम्बी ब्रेकिङ सिस्टम (सीबीएस) र त्यसभन्दा माथिका बाइकमा एन्टी–लक ब्रेकिङ सिस्टम (एबीएस) अनिर्वाय गरेका कारण सबै स्कुटर तथा बाइकको मूल्य वृद्धि हुने भएको हो । भारत सरकारले दुई पाङ्ग्रे सवारीसाधनमा सुरक्षा फिचर अनिर्वाय गरेकाले त्यसवापतको मूल्य बढ्ने भएको हो ।
अहिले नेपाली बजारमा बिक्री वितरण हुँदै आएका अधिकांश मोटरसाइकल तथा स्कुटरमा एबीएस सुविधा उपलब्ध रहेको छैन । अब भारत सरकारको नयाँ नियामानुसार सबैमा अनिर्वाय सुरक्षा फिचर लगाउनु पर्ने भएकाले नेपाल आउने बाइकमा पनि उक्त फिचर थप भएर आउँदा हरेक सीबीएस थप भएको बाइकको मूल्य कम्तीमा ५ हजार र एबीएस भएको बाइकको मूल्य ३० हजारसम्म महंगो हुन लागेको हो ।
‘अहिले नै भारतमा धेरै बाइकमा एबीएस सुविधा उपलब्ध भैसकेको छ । हाम्रो बजारमा एबीएससहितको बाइक ल्याउदा ३० हजारसम्म महंगो पर्छ’ एक बाइक बिक्रेताले भने ।
उनि भन्छन् ‘हामी अहीले प्रतिष्पर्धी ब्रान्डले केहीलेबाट ल्याउँछ त्यो हेरिरहेका छौं । एक्लै ल्याउँदा आफ्ना बाइक महँगो हुने र ग्राहक अन्य कम्पनीमा जान सक्ने हुन्छ । त्यसैले हामी पर्ख र हेरको स्थितिमा छौं ।’
यसले के देखाउँछ भने कम्पनीहरु चाँडै ती थप भएका सुरक्षा फिचरसहितका बाइक नेपाली बजारमा ल्याउने तयारीमा जुटिसकेका छन् ।
यस कारण सीबीएस र एबीएस आवश्यक
नेपाली सडकमा सबैभन्दा बढी दुर्घटना हुने सवारीसाधन मोटरसाइकल र स्कुटर नै हो । यस्तोमा नेपालको खराब बाटोमा यस्ता सुरक्षा फिचरसहितका बाइक तथा स्कुटर झनै आवश्यक छ । कम्बी ब्रेकिङ सिस्टम (सीबीएस) र एन्टीलक ब्रेकिङ सिस्टम (एबीएस) ले मोटरसाइकल तथा स्कुटरको ब्रेकिङ सिस्टमलाई स्मुथ र सहज बनाउने छ ।
