बलात्कार अभियोगमा सात वर्ष जेल
काठमाडौँ, २९ कार्तिक । उदयपुर जिल्लाको त्रियुगा नगरपालिका–९ गैरुनका २५ वर्षीय विनोद परियार बलात्कार अभियोगमा ७ वर्ष जेल चलान भएको छ ।
उदयपुर जिल्ला अदालतले स्थानीय १५ वर्षीय किशोरीलाई बलात्कार गरेको अभियोगमा सात वर्षको जेल सजाय र पाँच हजार दण्ड जरिवाना गर्ने फैसला गरेपछि परियार जेल चलान भएको हो ।
बिहीबार जिल्ला न्यायाधीश दीपक खनालको इजलासले परियारलाई किशोरी बलात्कार गरेको अभियोगमा सात वर्षको जेल सजाय र पीडितलाई पाँच हजार क्षतिपूर्ति भराउने फैसला गरेको अदालतका स्रेस्तेदार राजकुमार आचार्यले जानकारी दिए ।
विसं २०७५ माघ २९ गते परियारले किशोरीलाई बलात्कार गरेको पीडितका आफन्तले प्रहरीमा जाहेरी गरेपछि फागुन २६ गते पक्राउ गरेर चैतदेखि अभियुक्तलाई बलात्कारसम्बन्धी मुद्दा चलाइएको पनि जिल्ला अदालत उदयपुरले बताएको छ ।