छिमेकीको हत्या गरेर गोरे फरार, पक्राउ गर्न सबै सीमा नाकामा प्रहरी परिचालन
कञ्चनपुर, २१ असार । कञ्चनपुरको पुनर्वासमा शनिबार राति धारिलो हतियार प्रहार गरी एक जनाको हत्या गरिएको छ ।
पुनर्वास नगरपालिका–५ का ५० वर्षीय गोपाल कुँवरको हत्या भएको जिल्ला प्रहरी कार्यालय (कञ्चनपुर) का डिएसपी अमर थापाले जानकारी दिएका छन् ।
हत्यामा उनकै छिमेकी ४० वर्षीय गौरव खड्का (गोरे) को संलग्नता रहेको प्रहरीले जनाएको छ । घटनापछि उनी फरार छन् । घटनाको कारण खुल्न सकेको छैन ।
उनको खोजी भइरहेको डीएसपी थापाले नेपालखबरलाई जानकारी दिए । उनी भाग्न जान सक्ने सम्भावित सबै नाकामा प्रहरी खटाइएको उनले बताए ।
धनगढीबाट कुकुर समेत ल्याएर अनुसन्धान भइरहेको प्रहरीले जनाएको छ । घटनास्थलमा अहिले एसपी मुकुन्द मरासिनी पनि पुगेका छन् ।