बुटवलमा एक कोरोना संक्रमितको मृत्यु
बुटवल, ५ भदौं । बुटवलमा एक कोरोना संक्रमितको मृत्यु भएको छ । बुटवलस्थित धागो कारखानास्थित कोरोना विशेष अस्पतालमा प्यूठानका ६४ वर्षीय मानबहादुर गौतमको कोरोना संक्रमणका कारण मृत्यु भएको कोरोना विशेष अस्पतालका फोकल पर्सन डा.सुदर्शन थापाले जानकारी दिएका छन् ।
उनी स्वर्गद्वारी नगरपालिका–७, सोत्रेका हुन् । उनी भदौ १ गते कोरोना विशेष अस्पतालमा भर्ना भएका थिए । भारतबाट रोजगारी गरेर फर्किएका गौतम नगरपालिकाले बनाएको क्वारेन्टिनमा बसेका थिए ।
स्वाव जाँच गर्दा उनमा कोरोना पुष्टि भएको थियो । त्यसपछि उनको प्यूठानमै उपचार भइरहेको थियो तर, संक्रमण पुष्टि भएपछि उनमा खोकी लाग्ने ज्वरो आउने र स्वाश प्रस्वासमा समेत समस्या देखिएपछि बुटवल ल्याइएको थियो । यहाँ उनको भेन्टिलेटरमा राखेर उपचार जारी थियो ।
सुगर र उच्च रक्तचापको विरामी समेत रहेका उनको आज बिहान साढे ६ बजे निधन भएको डा.थापाले जानकारी दिए । उपचारकै क्रममा गौतमलाई निमोनिया पनि देखिएको अस्पतालले जनाएको छ ।
