विद्रोहीसँगको युद्धमा गोली लागेर मारिए चाडका राष्ट्रपति
काठमाडौं, ७ बैसाख । अफ्रिकी राष्ट्र चाडका राष्ट्रपति इडरिस डेबी इट्नोको विद्रोहीको गोली लागेर मृत्यु भएको छ । एएफपीका अनुसार विद्रोहीसँगको युद्धका क्रममा पहिलो पंक्तिमा रहेर लडिरहेका राष्ट्रपतिको मृत्यु भएको हो ।
सोमबार मात्र उनी छैठौं कार्यकालको लागि राष्ट्रपतिमा निर्वाचित भएका थिए । चाडको सेना प्रमुखले ६८ वर्षका राष्ट्रपतिको मृत्यु भएको जानकारी दिएका हुन् । राष्ट्रपति इडरिस डेबीको मृत्यु भएसँगै यतिबेला उनको छोरा जनरल महामत काकालाई अन्तरिम सरकार प्रमुख बनाइएको छ ।
गत शनिबार मात्र चाड सरकारले विद्रोहीसँगको युद्धको क्रममा ३ सय विद्रोही मारिएको बताएको थियो भने १५० विद्रोहीलाई नियन्त्रणमा लिएको जानकारी दिएको थियो । त्यस दिन पाँच सरकारी सेनाको मृत्यु भएको थियो भने ३६ घाइते भएका थिए । सन् १९९० को दशकमा उनी पनि विद्रोही समूहको नेता थिए । त्यसयता निर्वाचनमा भाग लिएर सत्तामा आएका उनी लगातार ३ दशक सत्तामा थिए । एजेन्सी