रेल्वे लिक परीक्षणका लागि जनकपुर आइपुग्यो भारतीय एकडब्बे रेल
जनकपुरधाम, ३ साउन । रेल सञ्चालनको पूर्व तयारीका लागि रेल्वे ट्रयाक स्पिड परीक्षण र सर्टिफिकेसन गर्ने भारतको इष्ट सेन्ट्रल रेल्वेको डिजल लोकोमोटिभ एक मात्र डब्बा र इन्जिनसहितको रेल जनकपुर आइपुगेको छ ।
जनकपुरको कुर्था स्टेसनमा भारतीय रेल जनकपुर आइपुगेको हो । यहाँबाट प्रतिघण्टा १२० किलोमिटरको गतिमा सो रेल्वे ट्रयाकको परीक्षण गर्नेछ । रेल्वे लिक परीक्षणको लागि नेपाल रेल्वे कम्पनीका महाप्रबन्धक गुरु भट्टराईसहितका कर्मचारी जनकपुर आएका छन् ।
जनकपुरबाट भारतको जयनगर प्रतिघण्टा १२० को गतिमा लिक परीक्षण गर्दै रेल फर्किने रेल्वे विभागका साइड इन्जिनियर विनोद ओझाले बताए । कुर्थादेखि जयनगरसम्म ३५ किलोमिटर रेल्वे लिक निर्माण भएको छ ।
