निजी डेरीले पनि दूधको मूल्य प्रतिलिटर १० रुपैंयाँ बढाउने
काठमाडौं । निजी डेरी उद्योगहरुले दूधको मूल्य प्रतिलिटर १० रुपैयाँबढाउने घोषणा गरेका छन् । माघ १७ गते बसेको मन्त्रिपरिषद् बैठकले किसानले पाउने (कच्चा) दूधको मूल्य प्रतिलिटर ६.५२ रुपैयाँले वृद्धि गरी ५४ रुपैयाँ ०४ पैसा पुर्याउने निणर्य गरेको थियो ।
सरकारले कच्चा दूधको मूल्य बढाउने निणर्य गर्दै उपभोक्ता मूल्य निर्धारण गर्ने जिम्मा सरकारी स्वामित्वको दुग्ध विकास संस्थान (डीडीसी) लाई दिएको थियो ।
डीडीसीले बिहीबार काठमाडौंमा पत्रकार सम्मेलन गर्दै दूधको नयाँ उपभोक्ता मूल्यसूची सार्वजनिक गरेको थियो । डीडीसीले नयाँ मूल्यसूची सार्वजनिक गरेसँगै निजी डेरी उद्योगीले आज दूधको नयाँ उपभोक्ता मूल्य सार्वजनिक गरेका हुन् । शुक्रबार नेपाल डेरी एसोसिएसन र डेरी उद्योग संघले संयुक्त पत्रकार सम्मेलन गर्दै दूधको उपभोक्ता मूल्य प्रतिलिटर १० रुपैयाँले बढाएर ८६ रुपैयाँ कायम गरेको बताए ।