पोखरामा आज सत्ता गठबन्धनको चुनावी सभा, भोलि एमालेको
पोखरा । पाँच दलीय सत्ता गठबन्धनले आज (आइतबार) कास्कीको पोखरामा संयुक्त चुनावी सभा आयोजना गर्दैछ । सत्ता गठबन्धनले पोखराको अमरसिंह चौरमा बिहान ११ बजे चुनावी सभा गर्ने भएको हो ।
सभालाई प्रधानमन्त्री एवम् नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधव नेपाललगायत शीर्ष नेताले सम्बोधन गर्नेछन् ।
पोखरा महानगरपालिकाको प्रमुख पदमा सत्ता गठबन्धनका तर्फबाट नेकपा एकीकृत समाजवादीका नेता धनराज आचार्य र एमालेबाट कृष्ण थापा उम्मेदवार छन् । सत्ता गठबन्धन र एमालेले पोखरा महानगरपालिकाको निर्वाचनलाई प्रतिष्ठाको रुपमा लिएका छन् ।
पोखराको सभापछि आजै दाङको घोराहीमा हुने सभालाई देउवा र प्रचण्डले सम्बोधन गर्ने कार्यक्रम छ । आज सत्ता गठबन्धनको सभापछि भोलि एमालेले पोखरामा सभा गर्दैछ । सो सभालाई अध्यक्ष केपी शर्मा ओलीले सम्बोधन गर्ने कार्यक्रम छ ।
