मिटर ब्याजपीडितमाथिको दमनविरुद्ध नागरिक समाजको ‘मार्चपास’
काठमाडौं । बृहत् नागरिक आन्दोलनले मिटर ब्याजपीडितमाथि भएको दमनविरुद्ध खबरदारी गर्दै मार्च गरेको छ । पीडितमाथि भएको प्रहरी दमनको विरोधमा अभियानले बुधबार शान्तिबाटिकादेखि नयाँ बानेश्वरसम्म मार्चपास गरेको हो । श्याम श्रेष्ठ, खगेन्द्र संग्रौलालगायत नागरिक अगुवाले पीडितसँगै मार्चपास गरेका थिए ।
सोमबार भद्रकाली आसपास प्रदर्शनको तयारी गरिरहेका मिटर ब्याजपीडितलाई प्रहरीले शान्तिबाटिकामै रोक्न खोज्दा झडप भएको थियो । यसलाई लिएर पीडितहरुले मंगलबार उपप्रधान तथा गृहमन्त्री नारायणकाजी श्रेष्ठको राजीनामा मागेका थिए ।
दमनबारे छानबिनका लागि काठमाडौंका सहायक प्रमुख जिल्ला अधिकारीको संयोजकत्वमा पाँच सदस्यीय समिति बनाइएको छ । देशका विभिन्न जिल्लाबाट काठमाडौं आएका मिटर ब्याजपीडितहरुले दैनिक प्रदर्शन गरिरहेका छन् ।