ताइवानी श्रममन्त्रीले गरे ‘भारतीयलाई रङ्गको भेदभाव’, बिदेश मन्त्रालयले माग्यो माफी
ताइपेइ । संकटमा परेको श्रम बजारलाइ पूर्ति गर्न ताइवानले भारतीय कामदारहरू लैजाने भएको छ । तर, आप्रवासी कामदारको रूपमा भारतीयहरूलाइ आफनो देशमा भर्ती गर्ने सम्भावित तयारी हुँदै गर्दा भारतीयहरूको छालाको रङ्ग, धर्म र आहारको बारेमा विवादास्पद टिप्पणी गरेपछि ताइवान बिबादमा परेको छ ।
गत हप्ता याहू टिभीसँगको अन्तर्वार्तामा ताइवानका श्रममन्त्री सु मिङ चुनले भनेका थिए, ‘ताइवानले भारतको उत्तरपूर्वी क्षेत्रबाट आप्रवासी कामदारहरू भर्ती गर्न चाहेको छ, जहाँ मानिसहरूको हाम्रै जस्तै छालाको रङ्ग र खानपिन पनि उस्तै रहेको छ’, उनले अगाडि यो पनि भने, ‘यसबाहेक त्यस क्षेत्रका अधिकांश मानिसहरू इसाई धर्मालम्बी रहेका छन्, तिनीहरू उत्पादन, कृषि र निर्माण जस्ता क्षेत्रहरूमा साँच्चै राम्रा छन् ।’
मुख्यतयाः भारतको उत्तरपूर्वका बासिन्दालाई मात्रै ताइवानमा श्रमका लागि छनौंट गरेर भेदभाव गरेको भन्दै ताइवानका श्रममन्त्री बिबादमा परेका हुन् । श्रममन्त्री हुसुले ठूलो श्रम अभावका बीचमा द्रुत रूपमा बढ्दो जनसंख्याको सामना गरिरहेको दक्षिण एसियाली राष्ट्रबाट कामदारहरू ताइवानमा ल्याउन गत महिना भारत र ताइवानले हस्ताक्षर गरेको थिए, सो सम्झौताको बारेमा प्रश्नको जवाफ दिँदै उनले छालाको रङ्ग, खानपिन र धर्मका कुरा जोडेका हुन् ।
तर, भारत विश्वको सबैभन्दा धेरै जनसंख्या भएको देश हो, जसको विविध संस्कृति, धर्म र जातीय पृष्ठभूमिको मिश्रणको लागि परिचित छ । जसले कहिलेकाहीं समूहहरू बीचको द्वन्द्व निम्त्याएको छ । चीन, बंगलादेश र म्यानमारको सीमाना जोडिएको देशको विशाल उत्तरपूर्वी क्षेत्रका भारतीयहरू अन्यत्र आफ्ना देशबासीहरू भन्दा बढी पूर्वी एसियाली रूप र रङ्गका हुने गरेको उनले जनाएका थिए । सुको टिप्पणीलाई ताइवानका सत्ताधारी र विपक्षी दलका सांसदहरूले आलोचना गरेका छन् । सो बिबादस्पद टिप्पणीपछि ताइवानको विदेश मन्त्रालयले भने हुसुको बिबादस्पद भनाईलाई लिएर ईमानदारीपूर्वक माफी मागेको ताइवानी सञ्चारमाध्यमले जनाएका छन् ।
‘ताइवानले कुनै पनि भारतीय कामदारलाई स्वागत गर्नेछ, जसले भर्तीका लागि शर्तहरू पूरा गर्दछ र उद्योगको माग पूरा गर्दछ, तिनीहरूको जातीय पृष्ठभूमिलाई पर्वाह नगरी स्वागत गरिनेछ’ बिदेश मन्त्रालयले एक विज्ञप्तिमार्फत भनेको छ, ‘ताइवानले भारतको विविध र समृद्ध संस्कृतिलाई सम्मान गर्दछ र भविष्यमा यसलाई दुई पक्षबीच श्रम सहयोग प्रवर्द्धन गर्न आधारको रूपमा प्रयोग गर्नेछ ।’ यसैबीच ताइवानको श्रम मन्त्रालयले सुले अन्तर्वार्तामा ‘उस्तै छालाको रङ’ उल्लेख गरे पनि भेदभावको कुनै मनशाय नभएको स्पष्टीकरण दिएको छ ।
