विश्वासको मत लिन नसकेपछि गण्डकीका मुख्यमन्त्रीले दिए राजीनामा
पोखरा । गण्डकी प्रदेशका मुख्यमन्त्री सुरेन्द्रराज पाण्डेले पदबाट राजीनामा दिएका छन् । विश्वासको मत लिन नसक्ने भएपछि आज (बुधबार) उनले पदबाट राजीनामा दिएका हुन् । उनले प्रदेश प्रमुख डिल्लीराज भट्टराईसमक्ष राजीनामा बुझाएका छन् ।
सत्ता गठबन्धनमा फेरबदल आएपछि माओवादी केन्द्रले फागुन २३ गते सरकारलाई दिएको समर्थन फिर्ता लिएको थियो । मुख्यमन्त्री पाण्डलेले बिहीबार (भोलि) सम्म विश्वासको मत लिनुपर्ने थियो । विश्वासको मत लिने वातावरण नभएपछि उनी राजीनामा दिने मनस्थितिमा पुगेका हुन् ।
पछिल्लो समय सरकार टिकाउनका लागि मुख्यमन्त्री पाण्डेले विवादास्पद छविका एकीकृत समाजवादीका सांसद राजीव गुरूङ (दिपक मनाङे) लाई भौतिक पूर्वाधार मन्त्री बनाएका थिए ।