कामदार ठग्ने ५ व्यवसायीलाई उन्मुक्ती, वारेन्ट जारी भएका अभियुक्त सिंहदरबारतिर घुम्दै
काठमाडौं, २० असार : रोजगारीका लागि मलेसिया जाने कामदारको स्वास्थ्य परीक्षणमा विभिन्न संस्था खडा गरी ठगीमा संलग्नहरुलाई प्रहरीले छानी छानी मात्रै कारबाही गरेको छ । मलेसिया जाने नेपाली कामदारहरुलाई बायोमेट्रिकको नाममा ५ स्वास्थ्य संस्थालाई उन्मुत्ती दिइएको हो ।
श्रम, रोजगार तथा सामाजिक सुरक्षा मन्त्रालयको निर्देशनपछि प्रहरीले बायोमेट्रिक प्रणालीमार्फत कामदार ठग्दै आएका ३५ संस्थाका ४२ व्यक्तिलाई प्रहरीले गत ७ जेठ २०७५ मा पक्राउ गरेको थियो । पक्राउ गरेका ती व्यवसायीहरु माथि प्रहरीले अनुसन्धान जारी राखेको छ । तर, कामदार ठग्ने ५ स्वास्थ्य संस्थालाई भने प्रहरीले छानेर उन्मुत्ती दिएको छ ।
पहुँचका आधारमा ती स्वास्थ्य संस्थालाई अनुसन्धानको दायरामा नै नल्याईएको बताइन्छ । बायोमेट्रिकलाई लागु गराउने प्रमुख संस्था नेपाल स्वास्थ्य व्यवसायी महासंघका सदस्यका समेत रहेका निलाम्बर झाको एभरेस्ट हेल्थ होमलाई कारबाहीको दायरामा ल्याइएको छैन । झाको बानेश्वरमा रहेको एभरेस्ट हेल्थ होमले पनि बायोमेट्रिक करोडौं ठगेको छ । झा नेपाल स्वास्थ्य व्यवसायी महासंघका सदस्य हुन् । कुनै बेला भेरी अञ्चल अस्पतालमा कार्यरत झा यसको प्रमुख हुन् । तर, उनले अहिले आफूले नभई भाई विनोद झाले सञ्चालन गरेको दाबी गरे । झाको एभरेस्ट हेल्थ होम अहिले पनि सञ्चालनमा छ ।
यसैगरी महाराजगञ्जमा प्रदीप फोइवाले सञ्चालन गरेको लोटस पोलिक्लिनिकलाई पनि कारबाहीको दायारमा ल्याइएको छैन । यस्तै जावलाखेलमा श्याम थापाले सञ्चालन गरेको प्रशान्ति हेल्थ केयर, मध्यबानेश्वरमा मीरा शर्माले सञ्चालन गरेको सहारा हेल्थ सेन्टर र महाराजगञ्जमा सुसान खड्काले सञ्चालन गरेको सनराइज पोलिक्लिनिक ठगीमा संलग्न छ । तर, यी संस्थाहरुलाई श्रम र गृहले छानेर बचाएको स्रोतको भनाई छ ।
फरार भनिएका सिंहदरबारतिर घुम्दै
वैदेशिक रोजगारमा जाने नेपाली कामदारको आपराधिक अवस्था पहिल्याउने भन्दै पैसा उठाउने जीएसजी सर्भिस नेपाल प्रालिका प्रमुख गोविन्द थपलिया फरारको सुचीमा छ । यस्तै जिएससीका गोपाल गुरुङ र मुकुन्दप्रसाद पन्त पनि फरारको सुचीमा प्रहरीले राखेको छ । तर, जिएससीका प्रमुख थपलिया खुलेआम हिडीरहेका छन् । प्रहरीले देखिने गरी नै कार्यालयमा नियमित गइरहेका छन् । त्यतिमात्रै होइन सिंहदरबार पनि छिर्ने गरेको बताइन्छ ।
यसैगरी बायोमेट्रिकको नाममा ठग्ने कैलाश खड्का र प्रविन तिवारी अझै फरारको सूचीमा छन् । मलेसियामा कामदार पठाउँदा स्वास्थ्य परीक्षण गर्ने ३९ वटा बायोमेट्रिक स्वास्थ्य संस्थाहरुको स्वास्थ्य ब्यवसायी महासंघका अध्यक्ष हुन् कैलाश खड्का । तिवारी महासंघका पूर्वअध्यक्ष हुन् । तिवारी र खड्काले नेपाल सरकारको स्वीकृतिविना नै पाइला पाइलामा घुस खुवाएर बायोमेट्रिक प्रणाली नेपालमा भित्राएका थिए । खड्का पनि खुलेआम हिडिरहेका छन् । तर, प्रहरीले पक्राउ गरेको छैन । उनीहरु विरुद्ध अदालतले पक्राउ वारेन्ट समेत जारी गरिसकेको छ । तर, उनीहरुलाई पक्राउ गर्न प्रहरीले चासो दिएको छैन ।
बायोमेट्रिक प्रणाली नेपालमा भित्र्याउने एमओयुमा हस्ताक्षर गर्ने नै खड्का र तिवारी हुन् । खुलेआम हिडिरहे पनि प्रहरीले एमओयुमा हस्ताक्षर गर्ने खड्का र तिवारीलाई अहिलेसम्म पक्राउ गर्न सकेको छैन ।
