फ्यान फलोअर्स बढि, हलमा दर्शकको ‘अनिकाल’
काठमाडौं, ६ असार । नायिका रेखा थापा फेसबुकमा सर्वाधिक धेरै लाइक कमाउने नेपाली नायिका हुन् । रेखा थापाको फ्यान फलोअर्सलाई छुन अरु नायिकालाई लामै समय लाग्छ । उनको फेसबुकमा ३३ लाख भन्दा बढी फलोअर्स देखिएका छन् । जसले उनको पेज लाइक गरेका छन् ।
नायिका रेखा थापाको चलचित्रले गरेको व्यापार भने निकै नै कमजोर छ । रेखाका पछिल्ला रिलिज चलचित्रहरु बक्स अफिसमा कमजोर हुँदै जाँदा उनी कमजोर बनेको अनुमान लगाइएको छ । केही बर्ष अघिसम्म रेखालाई पोष्टरमा देख्दा पनि दर्शक हलसम्म उर्लिएका थिए । अहिले उनको फ्यान क्रेज फेसबुकमा मात्र देखिएको छ, हलमा त्यो क्रेज छैन ।
सर्वाधिक धेरै फ्यान कमाएकी अर्की नायिका हुन् प्रियंका कार्की । जसको फेसबुक पेजमा लाइक गर्नेको संख्या २१ लाख भन्दा बढी छ । नायिका कार्की फेसबुक र इन्स्टाग्राममा बढी सक्रिय छिन् । उनी सामाजिक सञ्जाल राम्रोसँग चलाउन जान्ने नायिका हुन् भन्न सकिन्छ ।
उनको सामाजिक सञ्जालमा देखिएको क्रेज हलमा देखिएको छैन । उनको पछिल्लो रिलिज चलचित्र ‘प्रेमदिवस’ को ब्यापार चित्त बुझदो देखिएन । उनको आजसम्म सोलो नायिकाको रुपमा खेलेका चलचित्र चलेका छैनन् । सामाजिक सञ्जालमा उनलाई पछ्याउने र उनको प्रशंसामा नथाक्ने फ्यान थुप्रै छन् । तर, ती फ्यान नै हलसम्म आकर्षित भएका छैनन् ।
नायिका केकी अधिकारीको फ्यान क्रेज पनि गज्जबको छ । केकी सामाजिक सञ्जालमा विशेषगरी, राजनीतिक, सामाजिक, आर्थिक र समसामयिक बिषयमा कुरा गर्छिन् । उनलाई पछ्याउनेको संख्या करिब १० लाख छ । केकी अधिकारीको बौद्धिकताको चर्चा पनि हुने गर्दछ । तर, विडम्बना उनलाई पछ्याउनेहरु नै उनको चलचित्र हेर्न हलसम्म पुग्दैनन् । केकी अधिकारीले आजसम्म एउटै हिट चलचित्र दिन नसक्नुको कारण पनि यही नै हो । सामाजिक सञ्जालमा लाइक आउनु र हलमा दर्शक आउनु फरक कुरा हो भन्ने यसबाट पनि वुझ्न सकिन्छ ।
नायिका नम्रता श्रेष्ठलाई फेसबुकमा पछ्याउनेको संख्या १५ लाख बढी छ । नम्रता नेपाली चलचित्रकी भर्ससटायल नायिका हुन् । यसैले, उनको चलचित्र असफल नै भएका छैनन् । उनले काम गरेका चलचित्रले निर्माताको लगानी नउठाए पनि उनको अभिनयको तारिफ भने सधै हुने गर्दछ । नम्रता श्रेष्ठको सामाजिक सञ्जालमा देखिएको फ्यान क्रेज अनुसार दर्शक हलसम्म त आएका छैनन् । तर, उनको माथि उल्लेख गरिएका ३ नायिका भन्दा बढी नै क्रेज हलमा देखिन्छ ।
सामाजिक सञ्जालको सक्रियता र चलचित्रको व्यापार फरक कुरा हुन् । धेरै कलाकार सामाजिक सञ्जाललाई आधार मानेर आफ्नो लोकप्रियताको मापन पनि गर्छन् । यो केही हदसम्म सही नै होला । तर, यसले बक्स अफिसमा उछाल नै ल्याउँछ भन्ने देखिदैन ।
