भुवन केसीसँग रञ्जित गजमेर पनि भड्किए
काठमाडौं, २४ फागुन : सदावहार नायक भुवन केसीमाथि अहिले गीत चोरीको बात लागेको छ । भुवनलाई चलचित्र क्षेत्रमा स्थापित गर्न सहयोग पुर्याएका निर्देशक शम्भु प्रधानले आफ्नो अनुमति बिना गीत दुरुपयोग गरेको भन्दै प्रहरीमा उजुरी हालेपछि अहिले नायक भुवन केसी अप्ठ्यारोमा परेका छन् । प्रधानले भर्खरै बजारमा आएको भुवनले निर्माण गरेको चलचित्र ‘कृ’ मा आफ्नो गीत बिना अनुमति प्रयोग गरिएको भन्दै प्रतिलिपी अधिकार अनुसार उजुरी गरेका हुन् ।
अहिले शम्भु प्रधान मात्र होइन अर्का दार्जिलिङबासी भेट्रान संगीतकार रञ्जित गजमेर पनि अहिले भुवन केसीसँग भड्किएका छन् । रञ्जित अहिले नेपाल आएका छन् । रञ्जितको नेपाल आगमन ‘स्याल पनि कराउनु, बाख्रा पनि हराउनु’ भन्ने उखानसँग मिलेको छ । भुवन केसीले गीत चोरी गरेको आरोप लागेकै बेला रञ्जित पनि नेपाल आइपुगेका छन् । ३३ वर्ष अगाडि बनेको सम्झना फिल्मको सुपरहिट गीत ‘उकालीमा अघिअघि’’ को एउटा अंश बिना अनुमति भुवन केसीले आफ्नो फिल्म ‘कृ’ मा समावेश गरेका थिए । ओरिजिनल गीतका रचनाकार र संगीतकार रञ्जित गजमेरले नेपाल आएपछि यो कुरा थाहा पाए । अहिले उनी भुवनप्रति रुष्ट बनेका छन् ।
‘भुवन त मेरो एकदम नजिकको आत्मीय साथी पो हो त,’ उनले भने, ‘मेरो सिर्जनालाई यसरी कपि गर्नुअघि यसो एक कल फोन गरेर सोधेको भए के बिग्रिन्थ्यो र ?’ आफू नेपाल आएपछि पनि भुवनले सम्पर्कको प्रयास नगरेकोमा पनि उनको चित्त दुखाई छ । गजमेरले भने, ‘अरु बेला नेपाल आउना साथ फोन गथ्र्यो, भेट्न आउँथ्यो । तर, यसपाला कुनै खोजी नै गरेको छैन ।’ त्यसो त भुवन आज नै आफ्नो फिल्म ‘कृ’ प्रदर्शनका लागि छोरा अनमोल केसीलाई लिएर जापानतिर लागिसकेका छन् । गजमेर भने आजै सम्झनाका निर्माता–निर्देशक शम्भु प्रधानको साथ लागेर टेकुस्थित महानगरीय प्रहरी परिसर पुगेका थिए । तर, आज सार्वजनिक विदाले गर्दा प्रहरी कार्यालय बन्द थियो, र उनीहरु फर्के । भोलि फेरि बयानका लागि जाने रञ्जितले बताएका छन् ।
आफ्नो फिल्मको गीत चोरी गरिएको भन्दै निर्देशक प्रधानले कृका निर्माताद्वय भुवन केसी र सुवास गिरीविरुद्ध केही दिनअघि प्रहरीमा उजुरी गर्न पुगेका थिए । तर, प्रहरीले संगीतकारको पनि बयान लिनुपर्ने भन्दै उजुरी दर्ता गरेको थिएन । साथै प्रहरीले मुद्दा अघि बढाउनुको साटो दुवै पक्ष बसेर सहमति गर्न पनि सल्लाह दिएको छ । तर, प्रधान सहमतिको मुडमा छैनन् । उनले कृले कमाएको पैसाको ५० प्रतिशत हिस्सा आफूले पाउनुपर्ने माग गरेका छन् । यसका लागि अदालत पनि जाने उनी बताउँछन् । रञ्जितले भने व्यक्तिगतरुपमा आफूले क्षतिपूर्तिको माग गरेका छैनन् । ‘म गीतको सर्जक हुँ, तर फिल्म निर्माताको हिसाबले सबै अधिकार शम्भुजीसँग छ,’ उनले भने, ‘त्यसैले म व्यक्तिगतरुपमा क्षतिपूर्ति माग्दिनँ । अर्काको गीत यसरी सुटुक्क चोरी गर्नेले कानून बमोजिम सजाय पाउनुपर्छ भन्ने मात्रै मेरो माग हो ।’
