टोटेनहमलाई हराउँदै चेल्सी शीर्ष स्थानमा
काठमाडौं, ४ असोज । प्रिमियर लिग फुटबलमा चेल्सीले टोटेनहममाथि सहज जित निकालेको छ । आइतबार राति भएको खेलमा चेल्सीले टोटेनहमलाई ३–० गोल अन्तरले पराजित गरेको हो ।
टोटेनहमको घरेलु मैदानमा भएको खेलमा चेल्सीलाई जित दिलाउन थाइगो शिल्भा, एन्गोलो कान्टे र एन्टेनियो रुर्डिगेरले समान एक–एक गोल गरे ।
पहिलो हाफमा गोलरहित बराबरी खेलेको चेल्सीले दोस्रो हाफमा तीन गोल गरेको हो । खेलको ४९औं मिनेटमा शिल्भाले गोल गर्दै चेल्सीलाई अग्रता दिलाए । ५७ औं मिनेटमा कान्टेले गोल गर्दै चेल्सीको अग्रता दोब्बर पारे । खेलको इन्ज्यूरी समयमा रुर्डिगेरले गोल गर्दै चेल्सीलाई ३–० गोलको जित दिलाए ।
जितसँगै चेल्सीले ५ खेलबाट १३ अंक जोडेको छ । चेल्सी अंक तालिकाको शीर्ष स्थानमा छ । पराजित टोटेनहम ९ अंकसहित तालिकाको सातौं स्थानमा छ ।