मिटरब्याजी श्याम परदेशीलाई पाँच लाख धरौटीमा छाड्न अदालतको आदेश
काठमाडौँ । सम्पत्ति शुद्धिकरण मुद्दामा थुनामा रहेका सर्लाहीका मिटरब्याजी श्याम परदेशी भनिने श्यामकृष्ण साहलाई विशेष अदालतले पाँच लाख धरौटीमा रिहा (छाड्न) गर्न आदेश दिएको छ ।
विशेष अदालतका अध्यक्ष श्रीकान्त पौडेल, न्यायाधीशहरु शालिग्राम कोइराला र बलभद्र बास्तोलाको इजलासले परदेशीलाई धरौटीमा रिहा गर्न आदेश दिएको हो ।
परदेशीविरुद्ध सम्पत्ति शुद्धिकरण विभागले मुद्दा दायर गरेको थियो । विशेष अदालतका सूचना अधिकृत नारदप्रसाद भट्टराईले आइतबार अदालतमा उपस्थित गराइएका परदेशीलाई पाँच लाख धरौटीमा रिहा गर्ने आदेश भएको जानकारी दिएका छन् ।
परदेशीको मिटर ब्याजको कारण पीडितहरुले दिएको उजुरीमाथि छानबिन गरी विभागले मुद्दा दायर गरेको थियो । पीडितहरुले राजधानीमा विरोध प्रदर्शन गरेपछि सरकारले पक्राउ गर्नुका साथै छानबिन अगाडि बढाएको थियो ।