स्रोत नखुलेको दुई करोड ३० लाख रुपैयाँसहित चार जना पक्राउ
काठमाडौँ । राजस्व अनुसन्धान विभागको टोलीले काठमाडौँको क्षेत्रपाटीबाट स्रोत नखुलेको दुई करोड ३० लाख रकमसहित चार जनालाई पक्राउ गरेको छ ।
पक्राउ पर्नेमा व्यवसायी नरेश अग्रवाल र उनका सहयोगी रहेका विभागका महानिर्देशक नवराज ढुंगानाले जानकारी दिए । ‘राजस्व अनुसन्धान विभागको टोलीले करिब दुई करोड ३० लाख रुपैयाँसहित चार जनालाई पक्राउ गरेको छ’, उनले भने ।
व्यापारी नरेश अग्रवालको घरमा राजस्व अनुसन्धान छापा मारेपछि उक्त रकम फेला परेको बताइएको छ । बरामद गरिएको रकम हुन्डी कारोबारको हुनसक्ने अनुमान गरिएको छ । पक्राउ परेकाहरूविरुद्ध थप अनुसन्धानका लागि अदालतबाट म्याद थप गरेर हिरासतमा राखिने महानिर्देशक ढुंगानाले बताए ।