भोलि बागमती प्रदेशमा सार्वजनिक विदा, उपत्यकाका तीन जिल्लामा छैन विदा
काठमाडौं, ९ माघ । भोलि (शुक्रबार) उपत्यकाका काठमाडौं, भक्तपुर र ललितपुर जिल्ला बाहेक अन्यन्त्र बागमती प्रदेशभरसार्वजनिक बिदा हुने भएको छ ।
बागमती प्रदेश सरकारले तामाङ समुदायको सोनाम ल्होसारको अबसरमा प्रदेशमा बिदा दिने निर्णय गरेको हो । प्रदेश सरकारले दिएको बिदा उपत्यकाभित्रका तीन जिल्ला बाहेक अन्यमा लागू हुने जनाइएको छ । गृह मन्त्रालयका प्रवक्ता सहसचिव केदारनाथ शर्माले काठमाडौं, भक्तपुर र ललितपुरबाहेक बागमती प्रदेशका अरू जिल्लामा प्रदेश सरकारले दिएको बिदा लागू हुने जानकारी दिए ।
‘प्रदेशका तीन जिल्लामा बिदा छैन,’ उनले भने, ‘बागमती प्रदेशका अरू जिल्लामा बिदा हुन्छ । संघमार्फत् कार्यालय रहेका उपत्यकाबाहेक बागमती प्रदेशभित्रका अरू जिल्लामा बिदा हुन्छ ।’
गत वर्ष चैतमा बसेको केन्द्र सरकारको मन्त्रिपरिषद बैठकले उपत्यका बाहेक अन्य जिल्लाको हकमा प्रदेश सरकारले दिएको बिदा लागू हुने निर्णय गरेको थियो । प्रदेशले बिदा दिँदा केन्द्र सरकारमातहत दरबन्दी भएका कार्यालय खुलेपछि मन्त्रिपरिषदले यस्तो निर्णय गर्नुपरेको थियो । उपत्यकाभित्रका तीन जिल्लामा भने केन्द्र सरकारले दिए मात्रै बिदा हुनेछ ।
