बलात्कार आरोपी सिद्धबाबाद्वारा अदालतमा आत्मसमर्पण
मोरङ, २० फागुन । अनुयायीमाथि जबरजस्ती करणी गरेको आरोप लागेका सिद्धबाबा भनिने कृष्णबहादुर गिरीले अदालतसामु आत्मसमर्पण गरेका छन् ।
उनले जिल्ला अदालत सुनसरीमा आत्मसमर्पण गरेका हुन् । उच्च अदालतले माघ ९ गते पुर्पक्षका लागि गिरीलाई थुनामा पठाउने आदेश दिएको थियो । आदेश अनुसार उनलाई कारागार चलान गर्ने तयारी भइरहेको सुनसरी प्रहरीका एक अधिकृतले जानकारी दिएका छन् ।
अदालतमा मुद्दाको बहस हुँदै गर्दा आफ्नो विपक्षमा फैसला आउने भेउ पाएपछि उनी भारततिर भागेका थिए । उनी नेपाल प्रहरीका सुरक्षाकर्मीलाई समेत झुक्याएर भारततिर भागेका थिए ।
यसअघि १६ मंसिरमा जिल्ला अदालत, सुनसरीले उनलाई तीन लाख रुपैयाँ धरौटीमा छाड्न आदेश दिएको दिएको थियो । तर, जिल्लाको आदेशविरुद्ध सरकारी वकिल कार्यालय उच्च अदालत, बिराटनगर पुगेको थियो ।