क्रिकेटको अन्तर्राष्ट्रिय परीक्षामा नेपाल, अवसर र चुनौती दुवै
काठमाण्डौं, ५ फागुन : दुई हप्तापछि नेपाल अर्को ठूलो अन्तर्राष्ट्रिय क्रिकेटको परीक्षामा होमिंदै छ । जिम्बाब्वेमा हुने एक दिवसीय विश्वकप छनोट प्रतियोगिता नेपालका लागि एकातिर उत्कृष्ट दुई स्थानभित्र परेर विश्वकपमा प्रवेश गर्ने बाटो हुन सक्छ भने कम्तीमा पुछारको दुई स्थानभित्र पर्नबाट जोगिएमा नेपाल डिभिजन २ मा फर्किनु पर्ने छैन ।
टेष्ट खेल्ने र एक दिवसीय मान्यता पाएका गरी १० राष्ट्र सम्मिलित सो छनोट प्रतियोगिता नेपालका लागि चुनौती र अवसर दुवै हो । जिम्बाब्वेमा दुई हप्तापछि हुने विश्वकप छनोट नेपालले खेल्ने अन्तर्राष्ट्रिय क्रिकेटको ठूलो र कठिन प्रतियोगितामध्ये हुन सक्ने क्रिकेट खेलाडीहरू बताउँछन् । उक्त प्रतियोगितामा के पनि छ भने यसले नेपाललाई एक दिवसीय मान्यता पाएका राष्ट्रहरूसँग पहिलो पटक र टेष्ट मान्यता प्राप्त राष्ट्रहरूसँग दोस्रो पटक सामना गर्ने अवसर दिएको छ । अफगानिस्तान, हङकङ, स्कटल्याण्ड र जिम्बाब्वे रहेको समूहमा नेपाल परेको छ । उनीहरूसँगको प्रतिष्पर्धा नेपाली क्रिकेटलाई प्रमाणित गर्ने अर्को क्षण हुने खेलाडीहरू ठान्छन् ।
राष्ट्रिय टोलीका पूर्व कप्तान विनोद दास भन्छन्, ‘सम्भवतः नेपालले खेलेको सबैभन्दा चुनौतीपूर्ण प्रतियोगिता हुनेछ । यसमा हामी रमाउन सक्नुपर्छ । यो स्तरमा हामी उपयुक्त छौं भन्ने प्रमाणित गर्न खेलाडीहरूले ’डरमुक्त’ भएर खेल्न सक्नु पर्छ । अगाडिको बाटो सहज छैन । तर यसलाई अवसरको रुपमा लिने हो भने यो भन्दा राम्रो मौका शायदै पाउला अबको चार वर्षमा ।’ विश्वकप छनोट प्रतियोगिता खेलाडीहरूकै शब्दमा नेपालले अन्तर्राष्ट्रिय रूपमा गुमाएको साख फर्काउने अवसर हुनेछ ।
त्यस्तै वल्र्ड क्रिकेट लिग च्याम्पिनयशीप र चार दिवसीय प्रणालीको अन्तरमहादेशीय क्रिकेट प्रतियोगितामा सहभागी हुने ढोका समेत खुल्न सक्ने छ । ब्याटिङ नेपाली टोलीको चिन्ताको विषय बन्दै रहि आएको छ । नेपाल क्रिकेट संघका प्रमुख कार्य सञ्चालन अधिकृत छुम्बी लामाका अनुसार १० राष्ट्र सम्मिलित प्रतियोगिताको कम्तीमा पुछारको दुई स्थानमा पर्नबाट जोगिए नेपालले अन्य अवसरसहित एक दिवसीय मान्यता पाउने छ ।
उनले भने, ‘१० राष्ट्रमा चार वटा टेष्ट मान्यता प्राप्त राष्ट्र भइहाले । त्यो बाहेक बाँकी चार वटा राष्ट्रले एक दिवसीय मान्यता पाउने छ । पुछारको रहेका दुई टोली भने फेरि डिभिजन २ मा झर्ने आइसीसीले जनाएको छ । बाँकी प्रतियोगिताको निर्णय पनि चाँडै हुने बताइएको छ । त्यसका लागि सुधारिएको खेल खेल्नु पर्ने चुनौती खेलाडीहरूसामु छ । प्रतियोगिताका लागि दुई हप्ता मात्र बाँकी भएकोले नेपाललाई थप अभ्यासको समय छैन । 
आइपीएल प्रवेशसँगै काँधमा ठूलो जिम्मेवारी
जिम्बाब्वे जानुअघि नेपालले अब हङकङ र युएईसँग दुईवटा मैत्रीपूर्ण खेल खेल्ने कार्यक्रम छ । त्यसैले मुख्य चिन्ताको विषय रहेको ब्याटिङ सुधार्न १५ वर्ष राष्ट्रिय टोलीका प्रारम्भिक ब्याट्सम्यान रहेका परेश लोहनी सुझाव दिन्छन् । उनले भने, ‘मानसिक रूपमा तयार हुनुपर्छ । म क्रिजमा बस्छु । के छ र तीन वटा डट बल खाउँ । मेडन ओभर खाउँ । नन स्ट्राइक जाने र रन लिन जरूरी छ । त्यसो हुनासाथ विश्वास बढ्छ । यो त ५० ओभरको खेल हो २० ओभरको होइन नि ।’ हङकङ र अफगानिस्तानसँग बारम्बार खेलिरहेको हुनाले पूरानो अनुभव नेपालका लागि उपयोगी हुन सक्ने पनि ठानिएको छ ।
अनुभवी र युवा खेलाडी भएको नेपाली क्रिकेट टोलीमा नयाँ आशा देखिएको बताइन्छ । पूर्व कप्तान विनोद दासका अनुसार नेपालसँग क्षमता छ, कमी छ त मनोबलको मात्र । तर, पूराना अनुभवीसँगै युवा खेलाडीले नामिबियामा देखाएको प्रदर्शनबाट उनी आशावादी देखिन्छन् । उनी भन्छन्, ‘ठूलो रन बनाउन अहिले पनि नेपाल पारस खड्का, शरद भेषावकर र ज्ञानेन्द्र मल्लमा निर्भर छ ।
तर राम्रो कुरा के छ भने बिस्तारै १९ वर्षमुनिका खेलाडीहले पनि यो स्तरमा खेल्न सक्ने कुरा देखाइरहेका छन् । जुन भविष्यका लागि राम्रो संकेत हो ।’ अर्कोतर्फ अफ्रिकी राष्ट्र जिम्बाब्वेमा खेल हुनु नेपालका लागि फाइदा हुन सक्ने ठानिएको छ । किनकी नामिबिया र जिम्बाब्वेको मौसम र विकेटमा समानता देखिन्छ । कप्तान पारस खड्काले भने जस्तै नेपालले फेरि एक पटक प्रत्येक खेलमा उत्कृष्ट प्रदर्शन गर्नुको विकल्प देखिंदैन ।
