बेलायतमा एकै दिनमा एक हजार बढी संक्रमितको मृत्यु
बेलायतमा एक करोड २६ लाख बढीले लगाए खोप
बेलायत, २८ माघ । बेलायतमा कोरोना संक्रमणबाट मृत्यु हुनेको संख्यामा केहि दिनयता लगातार ओरालो लाग्दै गएको भए पनि मंगलबार ह्वात्तै बढेको छ ।
अघिल्लो दिन ३३३ जनाको मृत्यु भएकोमा मंगलबार मृतक संख्या बढेर १०५२ पुगेको ‘डिपार्टमेन्ट अफ हेल्थ एण्ड सोसल केयर’ ले दिएको जानकारी दिएको छ । पछिल्लो एक सातामा पाँच हजार ८३७ जना संक्रमितको मृत्यु भएको छ ।
यसैगरी पछिल्लो २४ घन्टामाभित्र थप १२ हजार ३६४ जना नयां संक्रमित थपिएका छन् । नयां थपिएका संक्रमितसंगै बेलायतमा कोरोना संक्रमितको संख्या ३९ लाख ७२ हजार १४८ पुगेको छ । संक्रमित संख्या भने अघिल्लो दिनको तुलनमा कमी आएको हो । बेलायतमा कोरोना संक्रमण दर पछिल्लो समयमा केहि कम भएको तथ्याँकले देखाएको छ ।
हालसम्मको तथ्याङ्क अनुसार बेलायतका अस्पतालमा २६ हजार ७३२ जना संक्रमितको उपचार भइरहेको छ भने तीन हजार २३० जना संक्रमित भेन्टिलेटरमा उपचारार्थ छन् । गत महिना बेलायतको अस्पतालमा भर्ना हुनेको संख्या ४० हजारको हाराहारीमा पुगेको थियो ।
बेलायतमा एक करोड २६ लाख बढीले लगाए खोप
बेलायतमा एक करोड २६ लाख भन्दा बढीले कोरोना विरुद्ध खोपको पहिलो डोज लिइसकेका छन् । ‘डिपार्टमेन्ट अफ हेल्थ एण्ड सोसल केयर’ ले सोमबार सार्वजनिक गरेको तथ्याँक अनुसार हालसम्म एक करोड २६ लाख ४६ हजार ४८६ जनाले खोपको पहिलो डोज लिएका हुन् । जसमध्ये पाँच लाख १६ हजार ३९२ जनाले खोपको दोस्रो (अन्तिम) डोज लिएका छन् । एजेन्सी
