लेखक कृष्ण आचार्यको दोस्रो उपन्यास ‘ब्लु डायरी’ बजारमा
काठमाडौं, १७ असोज । पत्रकार तथा लेखक कृष्ण आचार्यको दोस्रो उपन्यास ‘ब्लु डायरी’ एक कार्यक्रमकाबीच विमोचन गरिएको छ । नेपाल प्रज्ञा प्रतिष्ठानको सभा हलमा शनिबार अभिनेत्री गौरी मल्ल, लेखक तथा पत्रकार अश्विनी कोइराला, लेखक आचार्य र पाठक कुशल घिमिरेले संयुक्त रुपमा पुस्तक विमोचन गरेका हुन् ।
‘ब्लु डायरी’ विमोचन कार्यक्रममा अभिनेत्री मल्लले आफूले पुस्तकको पात्रका रुपमा आफूलाई अनुभूत गरेको बताउँदै यो पुस्तक हरेकको जीवनसँग मेल खाने खालको रहेको बताइन् । उनले पुस्तक पढेर जीवनबारे सबैलाई आग्रह समेत गरिन् । लेखक कोइरालाले पुस्तक निकै फरक सन्दर्भ र सरल भाषा–शैलीमा लेखिएको हुनाले सबै पाठकको मन जित्न सफल हुने बताएकी छन् ।
त्यस्तै, लेखक आचार्यले आफूले यो पुस्तकबाट आफूले धेरै अपेक्षा राखेको बताए । उनले पुस्तक मन परे ताली र मन नपरे गाली गर्न पाठकलाई आग्रह समेत गरे । पुस्तक आफुलाई प्रिय भएको र अब यो तपाईंहरुको पनि प्रिय बन्ने अपेक्षा गरेको बताए । बिएन पुस्तकले बजारमा ल्याएको ‘ब्लु डायरी’ उपन्यासको मूल्य ३५० रुपैयाँ मात्र रहेको छ । यसअघि आचार्यको ‘अप्रिल फुल’ नामक उपन्यास प्रकाशित छ ।
