काठमाडौँ कपनबाट पेस्तोलसहित युवक पक्राउ, गुण्डागर्दी गरेको आरोप
काठमाडौँ । काठमाडौँ जिल्ला प्रहरी परिसरले गुण्डागर्दी गरेको आरोपमा हतियारसहित एक युवकलाई पक्राउ गरेको छ । ताप्लेजुङको फुङलिङ नगरपालिका–९ घर भई हाल काठमाडौँ महानगरपालिका–६, सरस्वतीनगर वस्ने वर्ष २८ का प्रशान्त पराङदेवा लिम्बूलाई पेस्तोल र चक्कुसहित नियन्त्रणमा लिइएको प्रहरी परिसर काठमाडौँले जनाएको छ ।
उनको घरमा खोजतलास गर्दा कटुवा पेस्तोल थान–१, धारिलो चक्कु थान–२, फलामको हम्बर थान–१, मोबाइल थान–२ (आईफोन, सामसङ) बरामद भएको प्रहरीले जनाएको छ ।
गुण्डागर्दी तथा अवैध हातहतियार नियन्त्रण गर्ने जिल्ला प्रहरी परिसरको अभियानअन्तर्गत कपन क्षेत्रमा पछिल्लो समयमा गुण्डागर्दी गर्ने र समाजमा भय त्रास सिर्जना गर्ने व्यक्तिहरूको खोजतलस गर्ने क्रममा शंकास्पद गतिविधि गरेको सूचनाका आधारमा उनलाई पक्राउ गरिएको जिल्ला प्रहरी परिसर काठमाडौँले जनाएको छ ।
