ओली–प्रचण्डबीचको सहमति अनुमोदन गर्न बालुवाटारमा वाम नेताको बैठक सुरु
काठमाडौं, ७ फागुन । प्रधानमन्त्री निवास बालुवाटारमा एमाले र माओवादी नेताहरु सम्मिलित पार्टी एकता संयोजन समितिको बैठक सुरु भएको छ । केपी ओली र प्रचण्डवीच दुई दिनसम्म चलेको छलफललाई अनुमोदन गर्नका लागि एकता संयोजन समितिको बैठक बसेको हो ।
बैठकमा एमाले अध्यक्ष तथा प्रधानमन्त्री केपी ओलीसँगै एकापट्टी लहरमा माओवादी अध्यक्ष पुष्पकमल दाहाल ‘प्रचण्ड’ एमाले नेता झलनाथ खनाल र माओवादी नेता नारायणकाजी श्रेष्ठ छन् भने अर्को तर्फ एमाले नेताहरु माधवकुमार नेपाल र वामदेव गौतमसँगै माओवादी नेता रामबहादुर थापा बादल छन्।
बैठकले पार्टी एकतालाई पूर्णता दिनका लागि कार्यदल गठन गर्ने नेताहरुले बताएका छन् । बैठक साँझ ७ बजेदेखि बस्ने भनिए पनि राति ८ बज्नलाग्दा सुरु भएको छ ।
नेकपा एमालेका अध्यक्ष केपी शर्मा ओली र माओवादी अध्यक्ष प्रचण्डवीच ५ वर्ष आलोपालो प्रंधानमन्त्री चलाउने भद्र सहमति भएको छ । तर, पार्टी एकताका गर्दा यो सहमतिलाई ‘डकुमेन्टेसन’ नगर्न दुबै नेता राजी भएका छन् ।
प्रधानमन्त्री आलोपालो चलाउने सार्वजनिक घोषणा गर्दा सरकार कमजोर हुने र कर्मचारीहरुले पनि सरकारलाई नटेर्ने भएकाले यो सहमतिलाई ‘जेन्टलमेन एग्रिमेन्ट’ का रुपमा मात्रै लिइने शीर्ष नेतृत्वमा सहमति भएको उच्च स्रोतले बताएकाे छ ।
