प्रचण्डलाई एकीकृत पार्टीको अध्यक्ष बनाउँदा हुन्छ : झलनाथ खनाल
काठमाण्डौं, २५ माघ : नेकपा एमालेका पूर्व अध्यक्ष तथा पूर्व प्रधानमन्त्री झलनाथ खनालले वाम एकतापछिको एकीकृत पार्टीको अध्यक्ष पुष्पकमल दाहाल प्रचण्डलाई बनाउँदा केहि फरक नपर्ने बताएका छन् ।
उनले आफू प्रचण्डलाई एकीकृत पार्टीको अध्यक्ष मान्न तयार रहेको बताउँदै वाम एकता भड्किन नदिन अरुले पनि प्रचण्डलाई पार्टी अध्यक्ष दिन तयार हुनुपर्ने बताएका छन् । नेकपा एमालेका अध्यक्ष केपी शर्मा ओलीले प्रधानमन्त्री र अध्यक्ष दुबै पद आफैं राख्न चाहेको गुनासो माओवादी नेताहरुबाट आइरहेका बेला एमालेका पूर्व अध्यक्ष खनालले पार्टी एकताका लागि सबैले त्याग गर्नुपर्ने बताएका छन् ।
पार्टी एकतामा भईरहेको विलम्व र आंकाप्रति खनालले भने–‘बाहिर कुरा विभिन्न प्रकारका आउँछन् । तर, एकता प्रक्रिया टुट्न नदिन हामी सामुहिक रुपमा बसेर गम्भिर छलफल र समीक्षा गछौं । उनले पार्टी एकतामा दुवै पक्षको सम्मानजनक स्थिति हुनुपर्ने बताउँदै भने–‘पार्टी एकता हुन्छ, प्रचण्डलाई अध्यक्ष मानेर भए पनि एकतालाई भड्किन दिंदैनौं ।’ खनालले विगतमा नेकपा माले र माक्र्सवादीबीच पार्टी एकता गर्दा सानो पार्टीका नेता मनमोहन अधिकारीलाई अध्यक्ष दिएर मदन भण्डारी महासचिवमा बसेको नजीर अनुसार पनि अघि बढ्न सकिने बताएका छन् ।