राष्ट्रिय महिला फुटबल : सावित्राको चार गोलको मद्दतमा एपिएफ विजयी


प्रकाशित मिति : January 25, 2021

काठमाडौं, १२ माघ । राष्ट्रिय महिला लिग फुटबलअन्तर्गत आइतबार भएको खेलमा सावित्रा भण्डारीको चार गोलको मद्दतमा विभागीय टोली सशस्त्र प्रहरी बलको एपिएफ क्लब विजयी भएको छ ।

एफिएफ क्लबले विराटनगर महानगरपालिकालाई ७–० गोलअन्तरले पराजित गरेको हो । एपिएफ क्लबको यो लगातार दोस्रो जित हो । सातदोबाटोस्थित एन्फा कम्प्लेक्सको मैदानमा भएको खेलमा एपिएफले मध्यान्तरअघि नै ४–० गोलको अग्रता बनाएको थियो । मध्यान्तरपछिको खेलमा एपिएफले थप तीन गोल गर्‍यो । खेलको नवौं मिनेटमा एपिएफकी अनिता केसीले पहिलो गोल गरेकी थिइन् । खेलको २५ औं मिनेटमा सावित्रा भण्डारीले आफ्नो व्यक्तिगत पहिलो गोल गरिन् ।

खेलको ४२ औँं मिनेटमा भण्डारीले नै व्यक्तिगत दोस्रो, खेलको ७४ औं मिनेटमा भण्डारीले व्यक्तिगत तेस्रो तथा खेलको ८९ औं मिनेटमा व्यक्तिगत चौथो गोल गरेकी थिइन् । यस्तै अनिता केसीले खेलको ३५ औं मिनेटमा व्यक्तिगत दोस्रो गोल गरेकी थिइन् ।

यसैगरी एपिएफकी सरु लिम्बुले खेलको ७२ औं मिनेटमा गोल गरेकी थिइन् । खेलको प्लेयर अफ दी म्याच सरु लिम्बु घोषित भइन् । एपिएफले पहिलो खेलमा रौतहटको चन्द्रपुर नगरपालिकालाई ६–० गोलअन्तरले हराएको थियो ।

विराटनगरले भने पहिलो खेलमा स्याङ्जाको वालिङ नगरपालिकासँग एक एक गोलको बराबरी खेलेको थियो । महिला लिग फुटबलअन्तर्गत आज उदयपुरको चौदण्डीगढी नगरपालिका तथा रौतहटको चन्द्रपुर नगरपालिकाबीच हुने अखिल नेपाल फुटबल सङ्घ (एन्फा) ले जनाएको छ ।

प्रतिक्रिया दिनुहोस्