खातामा रकम नभएको चेक दिएर २० लाख ठगी गर्ने युवक पक्राउ
काठमाडौं, १९ असोज । खातामा पर्याप्त रकम नभएको चेक दिएर २० लाख ठगी गरेको आरोपमा एक युवक पक्राउ परेका छन् । पक्राउ पर्नेमा सिन्धुपाल्चोकको बलेफी गाउँपालिका–७ घर भई हाल काठमाडौंको महाराजगञ्ज बस्ने सुजन तामाङ छन् ।
तामाङले आफ्नो खातामा पर्याप्त मौज्दात रकम नभएको भन्ने जानी–जानी जाहेरवालालाई झुक्यानमा पारी ग्लोबल आईएमई बैंकको चेक काटी दिई बैंकिङ कसूर गरेको प्रहरीले जनाएको छ ।
सो कसुरमा उनलाई उच्च अदालत पाटनको गत २०७७ पुस ६ गतेको फैसलाले आठ दिन कैद र २० लाख रुपैयाँ जरिवाना ठहर भएको थियो । फरार रहेका तामाङलाई प्रहरीको केन्द्रीय अनुसन्धान ब्यूरोबाट परिचालित विशेष टोलीले महाराजगञ्जबाट पक्राउ गरेको हो । उनलाई फैसला कार्यान्वयनका लागि जिल्ला अदालत ललितपुरमा पेश गरिएको प्रहरीले जनाएको छ ।
