कलाकार सानु ताम्राकारको निधन
काठमाडौं । अभिनेता तथा जादुगर सानु ताम्राकारको ७४ वर्षको उमेरमा निधन भएको छ । दिवङ्गत अभिनेता सारुक ताम्राकारका पिता सानुको उपचारका क्रममा शनिबार नर्भिक अस्पतालमा निधन भएको हो ।
नर्भिक अस्पतालमा उपचारका लागि भर्ना भएको २८ औं दिनमा उनको निधन भएको कलाकार संघका अध्यक्ष मोहन निरौलाले जानकारी दिए । गत असारमा छोरा सारुक घरमा मृत फेला परेपछि सानु ताम्राकारको स्वास्थ्य अवस्था बिग्रिएको थियो । उनी साउनको दोस्रो हप्ता नर्भिक अस्पतालमा भर्ना भएका थिए । निरौलाका अनुसार आईसीयूमा भर्ना भएका ताम्राकारको पछिल्लो समय किड्नीमा समेत समस्या देखिएको थियो ।
उनको भोलि पशुपति आर्यघाटमा अन्त्येष्टि गरिने तयारी छ । सानु शास्त्रीय नृत्यमा पारंगत थिए । थुप्रै चलचित्र तथा सिरियलमा अभिनय गरेका ताम्राकारले तीन वर्ष चलचित्र कलाकार संघको कार्यवाहक अध्यक्षसमेत बनेका थिए । उनले ‘जीवन रेखा, बदलिँदो आकाश, निरमोही, जुन तारा, सुरक्षा, रगत, ज्वालामुखी, जीवन मृत्यु, मन मनै मन पराए, अभियान, पल, ग्याम्लर, भूँइमान्छे, मेरी मामु’ लगायतका फिल्ममा काम गरेका छन् ।
