काठमाडौँ राष्ट्रिय नाचघरमा आज गणेश रसिक एकल साँझ
सरोज राई
काठमाडौँ । काठमाडौँको राष्ट्रिय नाचघरमा आज (शनिबार) गणेश रसिक एकल साँझ हुँदैछ । दिउँसो ३ बजेपछि हुने कार्यक्रमको उज्यालो रेडियो नेटवर्कसँगै एनटीभी प्लसले प्रत्यक्ष प्रसारण गर्ने भएका छन् ।
दिउँसो ३ बजेदेखि शुरु हुने कार्यक्रम साँझ ६ बजेसम्म चल्ने जनाइएको छ । कार्यक्रममा किरण प्रधान, सूर्य थुलुङ, शम्भु राई, ठूले राई, सुनिता सुब्बा, सत्यकला राई, झुमा लिम्बू, साजन रार्य, रुपक चौधरी, सञ्जय तुम्रोक, दुर्गा परियार, श्रेयसी चेम्जोङ लगायतले पनि आ–आफ्नो प्रस्तुति दिनेछन् ।
मौलिक लोककला र साहित्यको प्रवर्द्धनसँगै गाउँका युवालाई पर्यटन व्यवसायसँग सम्बन्धित सीपमूलक तालिम दिलाउन आवश्यक कोष खडा गर्ने उद्देश्यले कार्यक्रम गर्न लागिएको आयोजक छिनामखु समाज काठमाडौँले जनाएको छ ।
भोजपुरको छिनामखुमा जन्मिएका गणेश रसिकको संगीत तथा स्वरमा दर्जनौँ गीत लोकप्रिय छन् । उनका कविता, उपन्यास, संस्मरण र निबन्ध विधामा पुस्तक पनि प्रकाशित छन् । उनले संगीत र साहित्यमा फरक पहिचान बनाएका छन् ।
